साधनि वदनि भाई वीठलदास साहिब जनि जे परलोक पधारिजण जो अहवालु चौतरफ़ लिखियो वियो। जंहिंकरे केतिराई संगी दूर दूर शहरनि खां बारहें ताईं अची कठा थिया। हिन वक्त आसण ते विहण लाइ पीढ़ीअ मां पेंटि बियो साधु कोन हो। दरबार जा असुली चेला बाकी ट्रे बचिया हुआ। भाई दियालदासु, भाई दाँ॒दूराम ऐं भाई होतूराम। भाई दियालदास असुल खां भण्डारे जी शेवा वदनि साधनि खां घुरी वरिती हुई ऐं हू उन्हीअ में राज़ी हो, तंहिंखां सवाइ बिल्कुलु बिरधु शरीरु हो। भाई दाँ॒दूराम ऐं भाई होतूराम बई हर तरह लाइकु, छा भजन करे छा जहानगीरी करे गोया हिक टारीअ जा ब सुन्दर फूल हुआ। कंहिंखे बि सरसु या घटि चवणु जणुकि पंहिंजे अखियुनि में धूड़ि विझिणी हुई। नेठि सभेई वदनि जा संगी अची गदु थिया। माता साहिब खां बि सलाह पुछी वेई, छो त अजु धणियुनि जे घर जी वदी इहाई हुई। सुख सां क्रिया करमु पूरो थियो ऐं साहिबनि जे अखण्ड पाठ जो भोगु पाए सभेई साध ऐं पंइच आसण वारे मन्दर में अची कठा थिया। उते सभु गाल्हियूं वीचारे, जोगिता संभारे ऐं निरमलता धारे, सभिनी साधनि ऐं पंइचनि जे विच में भाई होतूराम उथी खड़ो थी बीठो ऐं संगति खे अरदास कयाईं त हाणे हिन वदनि जे आसण ते लाइकु पुरुष खे विहारण जो वक्तु आयो आहे। मूं दिलि में चडी तरह तपास कई आहे त कींअं दरबार साहिब जो कमु अगे वांगुरु उजलु हलंदो ऐं कीअं वदनि जो नामाचारु दींहों दींहुं वधन्दो। इहे सभु ख़्याल संभाले मुहिंजी, साधनि ख़्वाहि पंइचनि खे अरंदास आहे त हिन आसण ते भाई दाँदूराम साहिब खे विहारियो। एतिरो चई अवलि पाण अची भाई साहिब खे वदनि जी जाइ समुझी मथो टेकियाईं। नेठि दस्तूर मूजिबि आसण ते विहण जूं सभु रस्मूं पूरियूं कयूं वेयूं ऐं सर्वगुण सम्पूर्ण भाई दॉंदूराम साहिब जनि तख़्त तां उथी अची बाहिरि खट ते वेही सजीअ पंगति खे दर्शनु दिनो। सुख सां समूरो कार्जु गुज़िरियो ऐं आयल महमान पहिंजे पंहिंजे शहरि रवाना थिया।
भाई दॉंदूराम साहिब जो गोठु देपरिजा आहै। नन्ढे हूंदे, साधनि वदनि भाई नारायणदास साहिब जे वक्त में, संदनि भाउ स्कूल में न पढण तां साणुनि खिट पिट कई हुई, तंहिं गाल्हि अहिड़ो वैरागु दिनुनि जो भजी जतोईअ हलिया आया ऐं साधनि में टिकी पिया। उन्हीअ वक्ति संदनि अवस्था अटिकल बारहनि जी हुई। इहा खिट पिट जणुकि संदनि भाग जें सूरज खे, बादलनि मां जाहिरु करण लाइ, छोही पवनि बराबरि हुई। जंहिंजे पैदा थियण करे खेनि सत्संगु नसीबु थियो। हिननि जो सुभाउ नन्ढे हूंदे खां ई सुशीलु ऐं गुर भगितीअ में भिनलु हो। सदाईं साध वदनि जी आज्ञा अनुसार वरितन्दा हुआ। कदहिं बि कहिं सां कौडो न बोलीन्दा हुआ ऐं हमेशह उदारचित रहन्दा हुआ, जंहिंकरे पूज वहुनि साधनि जो प्रेम बि साणुनि घणो हूंदो हो ऐं सदाईं हिननि खे पॉहिंजे वेझो रखंदा हुआ। संदनि गाइणु अहिड़ो प्रेम भरियों हूंदो हो जो कदहिं खणी जे साध वदनि खे शब्द बुधण ते दिलि थींदी हुई त हिननि खे आज्ञा कन्दा हुआ। मतिलबु त जीअं सूरजु खणी ककरनि में छिपियलु हूंदो आहे त बि संदसि सोझिरो लिकलु न रहन्दो आहे। तीअं ही अगरचि साधनि वदनि जे दींहंनि में खणी नन्ढा हुआ, तदहिं बि हिननिजी महिरबान नजर इएं ईं इशारा कन्दी हुईं त कहिं दींहुं संदनि वांगुरु सिकूं लाहींदा। दिलि जी दातारी असुल खां ई अहिडी हुयनि जो जे बिनि खां वधीक टियों चोलो पेतीअ में आयो त उन्हनि मां हिकिडो ज़रूरु कंहिं न कहिं उघाडे जा लिङ ढकिण लाइ कहिं ज़रूरत मद खे देई छदींदा हुआ। जे पढ़ण लाइ कंहिं बिए शहर में वदनि साधनि जे आज्ञा सां वेन्दा हुआ त उते पंहिंजे मिठे सुभाव सां अहिडो त कुर्ब जो बिजु छटे ईन्दा हुआ जो वधी वञी वणु थींदो हो। जदहिं जदहिं चारि दोकड़ वधी पवन्दा हुअनि त अखण्डु पाठु रखाए लुटे छंदीदा हुआ। नेठि कारकतनि में अखण्ड पाठ रखाइण जो संदनि उमिरि भरि जो नियमु थी पियो। संदनि रहिणी शुरूअ खां ईं बेनजीर हुईं।
आसण ते विहण खांपोइ कुझु अर्से गुज़िरण बइदि साधनि वदनि खे ख्यालु आयो त जेकर सिन्धु जे बियनि आखाडनि खे जिनि सां वद्नि जो रिश्तो हो तिनिखे बि घुराए अशनेहु ऐं उत्साहु वधाइजे, इनकरे सियारे गुज़िरण बइदि भाई होतूराम ऐं भाई आत्माराम खे सन्तनि खे कोठ दियण लाइ रवानों कयाऊं, जे हमलु, काज़ीअ जो गोठु, पीर जो गोठु, रतोदेरो, मेहडि, मंगवाणी, थल्हो, फ़रीदआबाद, मांझदि वग़ेरह घुमन्दा संतनि खे मनाईंन्दा सुख सां मोटी मिठियाणीअ आया। हिन उत्सव जूं चिठियूं दरबार जे प्रीतिवाननि ऐं दासनि, जेके बियनि शहरनि में रहन्दा हुआ, तिनि दांहुं बि वेयूं। सभेई मुकररु कयल दींहं ते अची हाजुरु थिया।
जहिं वक्त बाहिरियां सन्त महात्माऊ अची मिठियाणिनि जे स्टेशन ते लथा एं इहा ख़बर दरबार में पहुती, तंहिं वक्त हवा में बन्दूकुनि जा अवाज आतिश बाज़ीअ जे फटाकनि वांगरु गजकार करण लगा। नेठि सभेई गदिजी शहर दांहुं हलिया। वाजा वजन्दा हलनि ऐं पताशा सन्तनि मथां उछिलाया पिया वञनि जे गोठ जा माण्हू श्रद्धा सां मेडियो पिया खाइनि। अहिडीअ तरह पंधु कन्दा दरबार में आया, जिते मथो टेके हरिको वञी पंहिंजे पंहिंजे देरे ते आरामी थियो। सन्तनि लाइ ओताकूं ऐं बिया बन्दोबस्त धार-धार हुआ। सभिनी साधनि महात्माउनि रसोई हिक ई भंडारे मा पाती थे। मतलबु त हुननि जा वार, साधनि वदनि जो प्रेम रूपी जारु किस्मत साणु आणे हिक हंधि काबू कया हुआ। एतिरनि महन्तनि जो हिक हंधि मेलो बि सभिको कोन सभिरंदो। शाम जो कथा कीर्तन शुरू थियो जो रात जो यारहें बजे समाप्तु थिया ऐं पोइ प्रसादु पाए हरिको वञी आरामी थियो। सुबुह जो श्री अखण्डु पाठु साहिबु शुरू थियो, जंहिंजो भोगु टिएं दींहुं पियो। भोग वारे दींहुं सुबुह जो सभिनी महंतनि खे वठी आणे दरबारि जे अङण में मथे आसणनि ते विहारियो वियो, बी ख़ल्कि हेठि गिलिमनि ते अची वेठी ऐं कीर्तनु शुरू थियो। साधनि वदनि उन वक्ति पोशाकूं घुरायूं जे हिक हिक करे हरहिक महन्त खे हेठि खां वठी मथे ताईं ढकायूं वेयूं ऐं पिणि गले में मगिजाति जो हारु, तंहिंखां सवाइ टे लाकेट जिनमां हिक ते भाई नारायणदास साहिब, बिए ते भाई वीठलदास साहिब ऐं टिएं ते भाई दाँदूराम साहिबजा फोटू उकिरियल हुआ, से भेटा दिना।
अहिडीअ तरह उत्सवु ऐं कीर्तनु करे पोई मन्दर में हली भोगु पाताऊं। वाह, जो हर रोजु सत्संग जो रंगु थे लगो। अहिड़ीअ तरह चार दींहं उत्सव जा सुख सां गुज़िरिया, जंहिंखां पोइ हरिको महन्तु विदा थींदो वियो ऐं बिया आयल महमान बि रवाना थी विया।
साधनि वदनि “बाबा दाँ॒दूराम साहिब” जे शख़ावत खां हरिको नन्ढो वदो अहिडो त वाकुफ़ु हो जो चवनि त साध त अहिड़ा जो जेकी अचेनि सो लुटियो वेठा आहिनि। खणी को मकारु फ़कीरु वटिनि ईन्दो त बि गुरूअ अर्थि हुनखे खुशि करे रवानो कन्दा। मथिएं उत्सह खां अगु में नाताल जे दींहंनि में हिकिड़ो वाटहड़ फ़कीरु आयुनि त हुनखे सीअ खां हिकु चोलो ऐं बी मगि (लोई) देई रवानो कयाऊं ! कंहिं चयुनि त साईं ! अइड़ा त रोजु पिया ईन्दा पोइ घणनि खे राज़ी कबो? त जवाबु दिनाऊं त बाबा ! जे गुरूअ जे घर में हूंदो त उहे बि पहिरिजी वेन्दा। हीअ दरबार आहे गुरू नान्नक साहिब जो मोदी ख़ानो, उते जेको ईन्दो तंहिंजी कामिना गुरू साहिबु पूरी कन्दो।
साधनि वदनि जे सख़ावत जी हाक राजा इन्द्र जे नन्दनि बाग़ जे, फूलनि जे ख़ुशबूइ वांगुरु, चौतरफ़ फहिलिबी रही, जंहिंकरे दूर दूर देसनि तां साधू महात्माऊ ऐं फ़कीर वटिनि ईन्दा पिया हुआ, जिनि सभिनी खे यथा शक्तीअ राज़ी कन्दा रहन्दा हुआ।
साधनि वदनि जे सबाझे सुभाव करे मिठियाणिनि जे दरबार में माण्हुनि जी आमदर्फ़त दींहों दींहुं वधन्दड़ हुई ऐं दूर दूर देसनि जा साध सन्त उते अची विस्रामु पाईन्दा हुआ जंहिंकरे अहिडी रौनक लगी बीठी हुईं जो जणु त सदाईं वटिनि को मेलो हो। भण्डारो बि सदाईं सभिनी लाइ खुलियलु हो। जेकदहिं को काबि शइ वटिनि खणी ईन्दो हो त उहा ओदी महिल उते वेठलनि खे विरहाए दींदा हुआ, पोइ थोरी हुजे ख़्वाहि घणी, जंहिं आहरि उहा हूंदी तहिं आहरि विरहाए दींदा ऐं बिए दींहं लाइ न रखंदा हुआ। मतलबु त सुभाणे जा भाग सुभाणे सां। हिकिडे भेरे जी गाल्हि आहे त किथां अम्बनि जो टोकिरो आयुनि सो भण्डारीअ खे दिनाऊं त वञी विरहाइ । भण्डारीअ छा कयो जो अधु टोकिरो विरहाए, बाकी अधु बिए दींहं ते खाइण लाइ रखी छदियाईं। हूंअ त रोज़मरह कुझु न कुझु दरबार में पियो ईन्दो हो पर बिए दींहुं कुझु बि न आयो, तदहिं साधनि वदनि पुछियो त भाई! कालहोकीअ शइ मां कुझु बचाए त कौन रखियो अथव? भण्डारीअ हथ बधी चयो त साईं ! कालहोकनि अंबनि मां अधु बराबर बचाए रखियो अथमि। त था चवनि ”पले ख़र्चु न बांधे पखी'”‘। इहो अगेई वर्णनु थियलु आहे त हिन दरबार खे बी का सिखी, शेवकी, ज़मींदारी या बन्धियानु बधलु कोन हो। जेकी ईश्वर इछा, प्रारबोध मूजिबि अचेनि तंहिंते हमेशह राजी रहनि। संदनि हथ में अहिडी का बर्कत हुई जो संदनि भण्डारो सदाईं भरपूर पियो रहे।
सालि बि सालि ब दफ़़ा, हिकिड़ो कतीअ ऐं कारकतनि खां वठी गुरू नानक साहिब जे जनम वार ताईं ऐं बियो मांघ में शिवरात्रि ते, दरबार साहिब में चडा उत्सव कराईन्दा हुआ ऐं कदहिं कदहिं त बियनि आखाड़नि जा साधू महात्माऊ घुराए वदी धाम धूम सां अखण्ड पाठ साहिब रखाए, शब्द कीर्तन ऐं कथाऊ वारताऊं कराइन्दा हुआ, जंहिं में अटिकल चारि पंच हज़ार ख़र्चु थी वेन्दा हुआ, मगरि अहिड़ा त के बर्कत जा धणी हुआ जो कदहिं बि संदनि हथु न मुंसो एं अण हूंद मां हूंद करे पए देखारियाऊं।
वदनि खां वठी हिन दरबारि जो मांघ वारे महीने में शिव जो मेलो लगन्दड़ु आहे।
दींहों दींहुं दरबार साहिब में ख़ल्क जी भीड पेई वधे। को कहिड़े अर्थ, त को कहिड़ीअ आशा सां दर ते सुवालु खंयो अचे ऐं ही सख़ा जा साहिब बि गुरूअ जों कोठारु खोले संदनि ई नाले ते लुटे, हुननि जे दिलि जूं मुरादूं पूरियूं पिया कनि। हिक दफ़े जी गाल्हि आहे त संदनि हिकु प्रेमी सदाईं संदनि नजदीक रहन्दड ऐं संदनि सजीअ वृत्तीअ मां चडीअ तरह वाकिफ़ु अची इन्हीअ ख्याल में पियो त ही जे हेतिरा श्रद्धालू पिया था अचनि तिनि जा मतलब सचु पचु पूरा थियनि था या न? नेठि पंहिंजे दिलि में हिकिड़ो संकल्पु कयाईं ऐं पिणि हिक बिए माण्हूअ खां बि दिलि में संकल्पु करायाईं। हिन तरह त, प्रेमीअ दिलि में चयो त अजु जेकर साध वदा “संत बाबा दाँ॒दूराम साहिब” गंगाजीअ जो जणियो मुंहिंजे गिचीअ में विझंदा त बराबर समुझंदुसि त हू कामिलु फ़कीर आहिनि ऐं बिए दिलि में इहो संकल्पु कयो त जेकदहिं साधनि वदनि मूंखे गंगा जी पीताम्बरी मथे सां बधाई त आउं बि खेनि सचो मुर्शिदु करे मञींदुसि। बई संकल्प धारे अची साधनि वदनि जे भरिसां मथो टेके वेठा। ऐतिरे में हिकिड़ी माइं, जा गंगा तां थी मोटी आई हुई, सा बि उताहूं जो आंदलु प्रसादु साधनि वदनि वटि खणी आई, जंहिं में हिक पीताम्बरी, जणिया ऐं बियो प्रसादु हो। साधनि माईअ खां प्रसादु वठी, हिकु जणियो खोले प्रेमीअ खे चयो त भाई! ओरे आउ त तोखे हिन्दू करियूं ऐं इएं चई खणी जणियो गिचीअ में विधाऊंसि ऐं हिन बिए संकल्प कन्दड़ खे बि सदु करे पंहिंजनि हथनि सां मथे ते पीताम्बरी बधाऊं। इहो वृतांतु दिसी बई गदि गदि थिया। प्रेमीअ त संदनि अहिड़ियूं घणेई वार्ताऊं हिन खां अग में बि दिठियूं हुयूं पर हिन आज़मूदे संदनि दंदे आडुरियूं लगाए छदियूं I
साधनि वदनि खे बाहिर जे प्रेमी पुरुषानि वटां ओदांहीं वञण लाइ, कशशि थींदी ई रहन्दी हुई। नवाबशाह, हैदराबाद, कराची, लाड़काणो, मेहड़ि, फरीदाबाद, हमलु, थलो, सखरु, रतोदेरो वग़ेरह शहरनि वारा प्रेमी खेनि पाण वटि घुराइण लाइ चिठियूं पिया लिखन्दा हुआ। मगर संदिन दिलि दरबार साहिब खां बाहिरि निकरण ते कान थींदी हुई। जेकदहिं को तमाम घणी सताईन्दो होनि तदहिं लाचारु हुनखे नाराजु न कन्दा हुआ। पंहिंजे गोठ में बि दरबार साहिब खां बाहिरि समाधियुनि खूं परे कोन वेन्दा हुआ। सजो वक्तुं दरबार साहिब में आए वए जी शेवा में दिलि प्रसत्रु रहन्दा हुआ। पाणखे महन्त करे कदहिं बि कोन समुझन्दा हुआ। साहिब जी शेवा हमेशह पंहिंजे हथनि सां कन्दा हुआ। जेकदहिं को आदमी दरबार में कम वास्ते न हूंदों हो त पाण बीही बुहारी पाईंदा ख़्वाहि पाणी भरिंदा हुआ। हिकिड़े भेरे को परदेसी साधु अची दरबार जे दर ते लथो, घिटीअ मां पंहिंजो सामानु रड़िहे दरबार जे अङण में कयाईं। उते उन व्यक्ति साधान वदनि “साईं दाँ॒दूराम साहिब” खां सवाइ बियो को कोन बीठो हो तिनि खां पुछाए लगो त साईं ! महन्त कहिड़ो आहे? साधनि वदनि चयुसि त भाई तोखे आसण सां कमु कीन महन्त सां? तोखे घुरिजे कोठी, खट ऐं बिस्तिरो सो अचु त तोखे दियूं। इएं चई संदसि ट्रंक खणी हिकड़ीअ कोठीअ में रखी खेसि थांईंको कयाऊं। आराम खां पोइ उन्हीअ महिमान वरी किनि बियनि साधनि खां पुछो त साईं ! हिते महन्तु कहिड़ो आहे, कीन उहो कादे बाहिरि वियो आहे? तदहिं उन्हनि वराणी दिनयसि त भाई! महन्तु उहो अथेई जंहिं तुंहिंजी ट्रंक खणी कोठीअं में रखी हुई। साधु इहो बुधी विसमय में पइजी वियो ऐं संदनि निहठाईअ तां बलिहारु वञण लगो।
हिकिड़े भेरे ब टे नांगा फ़कीर वटिनि आया ऐं घुर कयाऊं त असांखे चादरूं बदनु ढकण वास्ते खपनि। साधनि वदनि “बाबा दाँ॒दूराम साहिब” मोदीअ खे चई खेनि चादरूं घुराए दिनियूं। अञां उहे उतेई वेठा हुआ त मथां चालीहारो खनु बिया फ़कीर अची निकिता, तिनि बि चादरुनि जी तलब कई। साधनि वदनि उन्हनि जी घुर बि पूरी करे सभिनी खे चयो त बाकी खाधे लाइ सीधो असांजे मोदीअ खां वञी वठो। हहिड़ियूं हकीकतूं दिसी माण्हू वधीक हैरानु थियण लगा। “साध की महिमा बेंद न जानहि” अहिड़ा केतिरा मिसाल देई केतिरा दिजनि। सवें अतिथि पिया अचनि मगरि ख़ाली हिकु बि कोन मोटे। संदनि हथ छूटि जी हद ई कान्हे। सजो सजो महिनो अखण्ड पाठ साहिब पिया रखाईनि।जंहिं उत्सव ते माण्हुनि जी एतिरी त भीड़ थींदी हुई जो दिहाड़ी सजो कि देढु दबो गीह जो खपी वेन्दो हो ऐं खाधो, जेतोणीकि सात्वकी तदहिं बि शहाणे नमूने न जो थींदो हो, मगरि पाण उहो ई ढोढो ऐं दालि अठें पहिरि खाईन्दा हुआ ऐं रात जो रुगो अधु सेरु खनु खीरु पीअन्दा हुआ। निन्ड्र बि बिल्कुलु थोड़ी कनि। “थोरी निद्रा अल्प अहारे, साध का थिंडु सदा बीचारे” पाण सदाई रात जो टीं बजे उथी इशनानु पाणी करे साहिबनि जी शेवा कन्दा हुआ ऐं पोइ पंहिंजे ख्याल में विहन्दा हुआ। इत्फ़ाक जे खणी सरीर में ठीकु न हूंदा हुआ त बि साहिबनि जी शेवा पंहिंजे हथनि सां जरूर कन्दा हुआ। गुरनि में दाढो सिदिकु हूंदो होनि। मतलबु त गुरनि जी शेवा छदे बाहिरि दाढो दुखियो लगन्दो होनि।” जंहिंकरे बाहिरि वञण में पिया कीबाईन्दा हुआ। संदनि दरबार जणुकि सुर्ग पुरी पेई लगी। छाकाणि त उते काबि वंहिंवारी गाल्हि ऐं बी का कल्पना जी वारता, कान हलन्दी हुई। सारो दींहुं नियम मूजिबि गुरनि जे वाणीअ जो प्रचारु लगो पियो हूंदो हो, जंहिंकरे दूर दूर देशनि खां माण्हुनि जी भीड़ वटिनि लगी रहन्दी हुई। केतिराई माण्हू संदनि नामाचारु बुधी अची खेनि चवन्दा हुआ त साईं। असां खे पंहिंजो शिष्यु बणायो, त के वरी पंहिंजा छोकिरा वठी अची चवन्दा हुआ त साईं ! अव्हीं हिननि खे पंहिंजो चेलो कयो। मगरि साध वदा सभिनी खे इएं ई चवन्दा हुआ त बाबा! असीं पाण शेवाधारी, दिसो था त दरबार में पिया आए विए जी शेवा कयूं। सो असां में त चेले या शिष्य करण जी समर्थी आहे ई कान, अव्हांखे इहो छोकिरो परमात्मा बख़्शे दिए, असांजी इहा ई आसीस अथव ऐं अव्हां में अहिड़ी सची श्रद्धा बणी रहे। अहिड़ा त आहिनि बाझारल “साईं दाँ॒दूराम साहिब”।
मिठियाणी मुल्क (सिन्धु) में मंहागाई वधन्दड़ हूंदे बि साध वदा “संत बाबा दाँ॒दूराम साहिब” हमेशह मूजिबि सम्बत 1956 खां वठी 15 अखण्ड पाठ वेसाख में, 15 कतीअ में, 15 मांघ में ऐं हिकु बड्रे जे गुरप्रभ ते रखाईन्दा आया। वरी सम्बत 2000 में बिनि मंजियुनि ते 9 बड्रे खां 13 कतीअ ताईं 61 अखण्ड पाठ साहिब रखायाऊं। सम्बत 2001 वेसाख में 15 पाठ रखाइण खां पोइ बि वरी 13 बड्रे खां 13 कती ताईं 60 अखंड पाठ रखायाऊ।
पूज साध वदा जदहिं नवाबशाह हिक प्रेमीअ वटि कोठ ते विया हुआ तदहिं उते ब दीवान हैदराबाद सिन्धु खां वटिनि आया हुआ ऐं खेनि पंहिंजो हालु बुधाए हैदराबाद हलण लाइ अर्ज़ु कयो, जंहिंकरे साध वदा ओदांहुं रवाना थिया, आउं बि साणुनि गदु वियुसि। मथियनि बिनि दीवाननि मां हिक जी भाइट्री उमिरि अटिकल 18-19 वर्ष व एफ ए इम्तहानु पासि कयल बेसुधि पेई हुई, जंहिंखे दुनिया जी काबि ख़बर कान थे पेई। माइटनि हिनजूं घणियूं ई दवाऊं कयूं हुयूं ऐं घणनि ई वेजनि, तबीबनि ऐं डाक्टरनि खे आन्दो हो पर कहि बि दवा रतीअ जेतिरो फ़र्कु बि कोन कयो हो। पर वरी के पीर फ़कीर पुछा हुआऊं पर उताहूं बि वाह कान वरि थियनि। आखिरि हिक प्रेमीअ खां साधनि वदनि जो दसु पियुनि तंहिंकरे उन्हनि खे हैदराबाद वठी विया। साध वदा वटिनि हिक हप़्तो रहिया जहिं वक्त में छोकिरी चडी भली थी जो माइट दिसी बिल्कुलु ख़ुशि थिया। सुवालियुनि जो सुवालु पूरो करे पोइ साध वदा “संत बाबा दाँ॒दूराम साहिब” मोटी मिठियाणी दरबार साहिब में आया।
सन् 1944 ई. में मिठियाणीअ खे दर्याह शाह गिरिकाइणु थे चाहियो, बाकी थोरे मुफ़ासिले ते बीठलु हो। सजे शहर ऐं में पसिगिरिदाईअ में हिरासु छांइजी वियो। किथे किथे त लदिण जी तियारी बि पए कई वेई। आख़िरि गोठ जी पंइचाति कठी थी जंहिं पूज्य सन्त बाबा दाँदराम साहिब जनि खे अर्जु कयो त साईं हाणे नाज़ुक वक्तु आयो आहे। शहर खे बचायो न त थोरनि दींहनि में दर्याहशाहु हिन गोठ खे खाई वेन्दो, पाणी नदीअ में दाढो चढियलु आहे। पावक पिणि तेजु अथसि राति जो पिणि पाणीअ जी गड़िगाटि ज़ोर शोर सां शहर में बुधण में पेई अचे।
साधनि बिए दीहुं सुबुह जो सभिनी पंइचनि सां गदु पाण सां लाल साहिब जो बहिराणो ऐं गुरू ग्रंथ साहिब जी हसवारी कढी दुहिल शरनायुनि सां वञी दर्याहशाह जे किनारे ते देरो कयो, जिते ताहिरी, कणाहु प्रसादु, कुहर ऐं बियूं सेसाऊं तयारु करायूं वेयूं।
माण्हुनि में ख़ुशीअ जी लहर छांहिजो वेई हरकंहिं खे इहा अन्दर में उकीर हुई त इझो था साईं जनि हिन दूल्ह दर्याह शाह खे पुठिते मोटाईनि, मगरि जीअं पोई दर्याहशाहु उन महिल पाइणु वधीक पिए कयों, भिक मथां भिक पिए किरी यकिदमि ख़ुशीअ सां गदु माण्हुनि में मायूसी छांहिजी पाए वेई। आख़िरी अरदास करण जो वक्तु आयो। पलउ पाए साधनि अरदास शुरू कई । अरदास करण महिल अहिंड़ी त शांति लगी पेई हुई जो दर्याहशाहु पंहिंजी पावक ऐं पाणीअ जो गड़िमादु बन्दि करे, जणु त अरदास बुधण लगो । उन वक्ति इहो लकाउ दिसी हरकंहि जे अन्दर जी उदासाई उदासी वेई ऐं मन जी मायूसी मिटिजी वेई मगर उन बजाइ ख़ुशीअ जी लहर नज़र पिए आई।
अरदास बेहद चांवरनि जूं सत देगियूं दर्याहशाह खे अर्पणु करे पाणीअ में विधाऊं ऐं” दर्याहशाह तूं महिर कंजाइ” इहे लफ़्ज़ हर कंहिंजे मुख मां निकिता। बसि, पोइ त ईश्वर उन्हीअ अरदास खे अघायो। पोइ सभु पंइच गदिजी साधनि सां गदु वापसि आया । सजी राति दौंकनि जी झुमिरि ऐं शब्द कीर्तन ऐं शरनायुनि जो लुत्फ़ु पए माणियाऊं। उन दींहं खांपोइ मिठियाणीअ ते कदहिं बि दर्याहशाह नज़र न फेराई, हमेशह रहम जी नजर रखन्दो पए आयो न त हर साल कुझु न कुझु हिस्सो पियो मिठियाणीअ जो गिरिकाईन्दो हो। इहा हाक सारीअ सिन्धु में फहिलजी वेई ऐं पूज साधनि खे वाधायुनि जूं तारूं ऐं पत्र अचण लगा।
इन रीति साध वदा, खिम्या जा भंडार पंहिंजे आखाड़े में रही ईश्वर जे भगितीअ ऐं साधनि संतनि जे शेवा में वक्तु गुज़ारण लगा।
आखिर सियासी मामिले जे फ़ैसिले लाइ हिन्दुस्तान खे ब टुकरा कयो वियो ऐं संदनि जन्म भूमी पाकिस्तान में वेई। उते हिन्दुनि जी इज़्ज़त, धर्म, हयाती ख़तिरे में दिसी जीअं बिया सन्त ऐं आमु ख़ल्क सिन्धु छदण लगा तीअं साधनि वदनि पिणि वतन खे अलविदा करण जो ख़्यालु कयो। दरबार में सन्दनि प्राण हुआ। जण खां नेपाजु वधीक आहे। दरबारि खे हिननि औज ते रसायो ऐं जदहिं उनखे छदे परदेस हलण जो वक्तु आयो, तदहिं ईश्वर जो भाणो सति करे मञियाऊं। गुरनि जे हिक मंजीअ खांसवाइ, जा पाण सां खंयाऊं, बियूं समूरियूं मंजियूं, हज़ारें रुपयनि जा रेशमी रुमाल ऐं बी सामग्री, अगियनि महन्तनि जूं समाधियूं ऐं बियो केतिरो कीमती सामानु सरनि दर्याह करे आया। दर्याह जा सवें बासण उते ग़रीबनि में विरहाए छदियाऊं। परउपकार जो अंगु त मंझिनि असुल खां आहे।
सिन्धु मां जहाज रस्ते मुम्बईअ खां थींदा, पहिरीं भरोच में आया। जिते सवा महीनो खनु रही मन्दसौर रवाना थिया। उते दहाको महिना रही अजमेर आया। उहा ई सिन्धु वारी रहिणी, उहे ई कथाऊं ऐं शिव जा मेला, जाइ अजमेर में बिल्कुलु तंगि हुअनि पर साध वदा “संत बाबा दाँ॒दूराम साहिब” दिलि जा दर्याह हुआ। महिमान थे आया त कपिड़नि में नथे मापिया। गदि गदि पिया थियनि ऐं थींदा हुआ। गुरूअ जो अखटु ख़ज़ानो मिलियलु अथनि जो पिया लुटीनि। उहे ई मिठियाणियुनि वारा भण्डारा पिया हलानि। जेको दर्शन जी प्यास रखी ईन्दो हो, तंहिंखे पहिरीं त चवनि कुझु खाई पाणी पीउ, दर्शन करण सां अन्दर में सीतलता अचियो वासो करे। जिनि बि साईं दाँ॒दूराम साहिब जनि जो दशंनु कयो आहे तिनि खे ख़बर आहे त-
सन्तोष सरूप, खिमिया जा सागर, भगितीअ जा भण्डार ही सन्त अहिनि । ” खिमिया, ग़रीबी, बन्दगी, इस सन्तति की रीति” ट्रेई गुण साधन वृदनि में नज़र ईन्दा। कदहिं बि जबान मां खोहरो लफ़्ज न कढन्दा हुआ। जे साणुनि चडो न हलन्दा हुआ, तिनि सां बि थाल भलाईनि।
संदनि ज़िबान में अजीबु मेठाजु में कशशि हुई। साध वदनि जे शुद्धि हर्दे में ग़रीबीअ जो वासो हो। तमना ऐं तृष्णा खां आजा, कंहिं बि संसारी चीज़ में मोहु न हुअनि। दियणु त को खांउनि सिखे। मिठियाणिनि जियां अजमेर में बि जेके साधू वटिनि ईन्दा हुआ, तिनि खे खाराए, पियारे, ढउ कराए कढन्दा हुआ। हिक दफ़े कंहिं साधूअ चयुनि त जेका धोती बदन ते पियल अथवा सा दियो। हिकदमि लाहे दिनाऊंसि । बिए भेरे वरी हिकिड़े फ़कीर कमीस घुरियनि जा खेनि पई हुई, बिना देरि जे उहा लाहे खेसि दिनाऊं। खेनि वठण में मज़ो नथो अचे, पर दियण में संदनि इहोई अकीदो थो दिसिजे त-
जो जाणे वठण पर दिंयणु दाउं नां,
उन्हीअ जो त इन्सान ई नाउं ना।
संघनि मुख मा वचन हुआ त हिन दरबार जो मालिकु आहे गुरु नानकु। असीं आहियूं संदनि टहिलिया। जेके संदनि ज़ियारत लाइ हिते अचनि था, तिनि जी टहल करणु असां जो फ़र्जु आहे।
आखाड़े में जेका बि चीज़ ईन्दी हुई सा हर कंहिंजे मुख में विझन्दा हुआ। को शेवकु संदनि लाइ का शइ, या टोलु खणी ईन्दो हो त ज़रो खणी बाकी समूरो भण्डारे में मोकिलींदा हुआ। अनेक दफ़ा चयों हून्दाऊं :-
वण्डे खाइणु बन्दगी,
छिपी खाइणु गंदगी।
छा भुगिड़ा हुजनि, छा मिठाई, सभु भंडारे में मोकिलींदा हुआ। हू पाण वटि कुझु बि न साढींदा हुआ। हिननि सांढियो हो साईंअ जा नालो ऐं उन सुआद अगियां शयुनि जा सआद तुच्छु आहिनि। संदनि रोजमरह जी रहिणी – कहिणी ऑला दर्जे जी हुई।
संदनि ज्ञान वारी गूढ़ी कथा बुधन्दड़नि जे भिटिकयलनि दिलियुनि खे शंती बख़शींदी हुई। कथा करण वक्ति पाण कथा जो रूपु थी वेन्दा हुआ। गुरू नानक जी जन्म साखी समुझाईन्दें दिलि उमंग सां भरिजी उछलूं दींदी हुई। कई दफा दिलि भरिजी ईन्दी हुई ऐं कथा बुधन्धड़ संदनि अखियुनि में आबु दिसन्दा हुआ। इहा साबिती काफी आहे त मालिक जे विछोड़े जी यादिगीरी संदनि नेणनि में नीरु थी आणे।
हिक गाल्हि जंहिं ते अनेक दफ़ा जोरु देई बुधाईंन्दा हुआ सा इहा आहे त ईश्वरु तीर्थनि ते न मिलन्दो। हू झंगलनि में कोन थो रहे। हू त असां खे वेझे खां वेझीअ चीज खां बि वेझो आहे। पाण उनजो साख्यातु मिसालु हुआ। खेनि केतिरनि हंधा नींढूं थे आयूं पर हर कंहिंखे इहो जवाबु पिया मोकिलीनि त अजमेर खां बाहिरि न निकरन्दासीं।
जिनिखे अन्दिरियों मज़ो आहे, से बाहिरि न भिटिकन्दा। हिननि साहिबनि खे पंहिंजो पाण मां मज़ो अची वियो हो। “‘सुञा सखिणा कोई नही, सभ के अन्दर लालु।’ हिननि संतनि इहो लालु लधो हो, पोइ बाहिरि छा वञी कनि। हिक प्रेमीअ लिखियुनि त असीं हरिद्वारि था वञूं सो अव्हीं बि महरबानी करे हलो। जवाबु मोकिलियाईं “असां वटि रोज़ु हरिद्वारु आहे।” तीर्थ बराबरि इन्सान जे अन्दर में आहिनि। संदनि चवणु आहे त हिक हंधि विहण सां एकान्ति में वक्तु गुज़ारिण करे आदमी मन जे फुरिणे खे सवलाईअ सां जीते सघंदो। सारो दींहुं आहिनि पाण ऐं अन्दर वारो।
दया ऐं उपकार जा त कोदिया हुआ। सहाओ आरितवारु या बियो को वदो दींहुं थियो त सुबह खां वठी सिज लथे ताईं प्यासियुनि जी धुमि लगी पेई हूंदी हुई। हरि किस्म जा दुखी वटिनि ईन्दा हुआ, जिस्म जा रोग ख़्वाहि अन्दर जूं पीड़ाऊं। ही कामिल गुरू निवृति करण वारा हुआ। पहिंजे तन खे तकलीफ़ दींदा हुआ, पर सवालीअ जो अर्ज़ु ज़रूरु अघाईन्दा हुआ।
हिक दफ़े जी गाल्हि आहे त हिक माई, रोज़ानो दरबार में ईन्दड़, अन्दर में शंका करे आई त वदा साध “बाबा दाँ॒दूराम साहिब” मूंखे को कमु कारि करण लाइ बि नथा चवनि। इहो ख़्यालु करे जीअं मथो टेकियाईं तीअं वदनि साधनि चयुसि त माई असां वटि सदिरीअ जो कपिड़ो पियो आहे उहा त सिबी दे। इएं चई खेसि कपिड़ो कढी दिनाऊं ऐं संदसि अन्दर जी आशा पूरी थी। हू दिलियुनि जा मालिक सभु जाणनि था सिर्फ़ि श्रद्धा जे दरकार आहे।
साईं दाँ॒दूराम साहिब जनि वाह जो मन खे मारियो हो। जंहिं चंचल मन दुनिया खे पंहिंजो ग़ुलामु बणायो हो, तंहिंखे हिननि सन्तनि ग़ुलामु कयो। दुनिया खे कैदि करण वारो संदनि कैदी थी चुको आहे। अजमेर में आए काफ़ी अर्सो थी वियो होनि पर पंहिंजीअ जाइ खां बाहिरि न निकिरण जो प्रणु पकीअ रीति पाड़ियो हुआऊं। साल सांदहि, हिक ई कमिरे में गुरूअ जे ओट में काटण सां कमाल कई अथनि ! सचु आहे जिनि दुनिया खां मुंहुं मोड़ियो तिनि ई मालिक सां मनु जोड़ियो।
जिन्हीं ईश्वर जो इश्कु कयो पंहिंजो अगुवानु तिन्हीं ई लालनि लालु लधो। सचे मालिक जे इश्क में राति दींहं रता रहनि। निंन्ड्र नेणनि में न अथनि छोत हू जाणनि था त :-
सुल्तानी सुहाग निन्ड्रू कन्दे न मिले।
संदनि दरबार न सिर्फ़ गुरूअ जी दरबार आहे पर हिकु धर्माऊ दवाख़ानो आहे। जिते नांतवांनु तन, तवाना थी वञनि था। जिस्म जा रोगी, दिलि करे दुखी, त हिन्दुस्तान जे कुण्ड कुड़िछ खां था अचनि (जो सिन्धी हरहंधि पखिड़िजी विया आहिनि), पर ही सन्त त आत्मिकु रोगनि मिटाइण जे काबिलु हुआ। जे सन्दनि सुहिबत में आया आहिनि त उहे इएं ई था चवनि
– तूंहबीबु, तूं तबीबु, तूंदर् जी दवा।
सवाली वटिनि बि हर नमूने जा ईन्दा हुआ। के अची घुरन्दा हुआ अनु, के धनु त के ताज़ो तनु। हिकु साधू हरिद्वार तरफ़ खां आयो हो जंहिंखे 250 रुपया घुरिबा हुआ। हिकदमि कढी दिनांउसि। संदिन अकीदो हो त हीअ दरबारि आहे गुरू नानक जी ऐं उता को बि सुवाली ख़ाली न वञणु घुरिजे। कोबि अर्ज़ु खणी कंहिं बि वक्त वटिनि वञो, हू ख़़फ़े थियण वारा न हुआ। दुनियवी घाटे में पीठल इन्सान जे पुकारुनि बुधण वारा, हर वक्ति मदद करण लाइ हाजुरु हुआ। जिअं ईश्वर खे कंहिं बि वक्ति सदे सधिजे थो, तीअं ही सन्त बि हर घड़ीअ हासुलु थी सघनि था। सद में सदु दियण वारा हुआ, जिनि बि में मंझिनि एतिकादु रखियो हो तिनि जे मन जूं मुरादूं पूरियूं थियूं हुयूं।
अजमेर में हिकु ब्रह्मणु, जंहिंजो नालो रूपो हो, वटिनि सुवाली आयो। साधनि वदनि खेसि खाराए, पियारे ढउ करायो। हिक कमीस ऐं आना पंज दिनाऊँसि। रूपो राज़ी न थियो। हिन निमाणो अर्ज़ु कयो त हू दाढो घुरजाऊ आहे। उन दींहु अखण्डु पाठ जो भोग पियो हो, सारे पाठ जी पैदाइश जंहिं गोथिरीअ में पियल हुई, सा समूरी रूपे ब्राह्मण जे झोलीअ में विधाऊं। नका गण, नका तोर। ब्राह्मण ख़ुशि थी वियो। हू अहिड़ा दया जा सागर आहिनि।अहिड़ा दर्याह दिलीअ जा मिसाल।
शिव जे मेले ऐं गुरू नानक जे जन्म दींहुं, वाह जी मौज मचाए छदियाऊं। “झंगल में मंगल’” बुधिबा आहिनि। हिननि संतनि त अखियुनि सा देखारिया। वीरानीअ में ‘वसिहं करण वारा हुआ। अखण्ड पाठ जा भोग, आमु माण्हुनि लाइ भंडारा, कीर्तन धुनी, सांदहि कलाकनि जा कलाक सत्संगु ! सचे आनन्द जो वायुमण्डल पैदा करे छदिया हुआऊं। अमृत रूपी सागरु वहाए छदियो हुआऊं। जंहिं मां चुकी पी हरिको सत्संगी तृप्त थी पे वियो। माण्हुनि जा अंबोह हुआ। हिकिड़ियूं टोेलियूं थे वेयूं त बियूं थे शहर मां आयूं। जीअं माण्हुनि जी पीह तीअं साध वदा गद् गद्। माण्हूं पुट परणाए बि उहा ख़ुशी न कनि जा ही साध हहिड़नि मोकनि ते ज़ाहिरु कनि था।
संदनि मिठियाणिनि वारा अखण्ड पाठ मशहूरु आहिनि। हिति बि दिलि घणोई थे चाहियो पर जाइ जे तंगीअ सबबि दिलि खे रोकयो वेठा हुआ। गुरूअ जे नाले सां वाह जो सिदिकु हुअनि। कुझु वक्तु थियो त अजमेर में वरी सताहां पाठ शुरू कया हुआऊं। हिकिड़े जो भोगु पाए बियो आंरभ कनि।
महराज मोहनलाल जंहि खे सिन्धु में “कंवर जो कवी” कोठीन्दा हुआ, तंहिंजो हिक दफ़़े वदनि साधनि वटि अचणु थियो। संदनि नालो बुधी दर्शनु करण आयो। उहो दींहुं, हीउ दींहुं साईं दाँ॒दूराम साहिब जनि जे दर्शन मां दिलि ईं न ढापी अथसि। दींहं राति वटिनि वेठो ई आहे। हुनजे भिटिकियल दिलि खे हिते ई करारु हासुलु थियो आहे। हिन सत्संगीअ ऐं सन्तनि जे शेवक कई स्लोक ऐं शब्द वदनि साधनि जे साराह में चया आहिनि।”
सताहनि पाठनि मां दिलि न ढापेनि। अजमेर में उहे मिठियाणिनि वारा अखण्ड पाठ शुरू कयाऊं। ब दफ़़ा हर सालि बिनि बिनि महिननि ताईं सादंहि अखण्डु पाठु पियो हले। पैसो पाणीअ जियां थो ख़र्चिजे। अजब में विझन्दड गाल्हिं त इहा आहे जो हिक हंधि वेठे हेदो चर्ख़ो थे हलायाऊं। चवणी आहे त ईश्वर जे गुप्त ख़ज़ाननि जूं चाबियूं सन्तनि महात्माउनि जे हथनि में थियूं रहनि। आहे बि सचु। अलाए किथां थी एदी रकम अचे के खणी सवालु कन्दा, शंका उथारींदा हुआ। जवाबु दींदा हुआ त ”निरंकारी नोट’ आहिनि। हेदे मांधांण खे मुंहं दियणु रवाजी इन्सान जो कमु न आहे। ईश्वरी संकल्प खे पूरो करण लाइ ईश्वरी शक्तीअ जी दरकार आहे। छा थो इहे ब महिना भण्डारो हले! ऐं जीअं मेड़ो मतो रहे तीअं ही साईं गद् गद्, नानक जे नाले तां जिन्सी बल्हार था वञनि। उनजे रंग में रंगिजी वेन्दा हुआ। हू दिन रात खेसि सारीन्दा हुआ, दिलि हुअनि प्रेम जो अखुटु भण्डारु ऐं उहो सारो प्रेम प्रभूअ लाइ ई हुअनि। प्रभात वेले कहिड़े न प्रेम ऐं श्रद्धा मां गुरूअ अगियां वेही भजनु कन्दा हुआ। पाणु भुलिजी वेन्दा हुआ ऐं दिलि करे त मालिक सां हिकु थी वेन्दा हुआ।
सचो प्रभु भगतु उहो जो गूंगो बि हुजे ऐं बोड़ो, अन्धो पिणि। हिननि संतनि में ट्रेई गुण हुआ, संसारिक बातियुनि में दिलचस्पी न वठन्दा हुआ। ज़िबान सां दुनियवी गाल्हियूं न करणु ई गूंगे थियणु आहे। आशिकु बोड़ो छो थिए? हुननि जा कन दुनिया जूं वार्ताऊं बुधणु नथा चाहीनि। संसार लाइ त हुन खे कन हुआ ई कोन, आशिकु उहो जो नाम रूप संसार दांहुं अन्धो हुजे। हू नाम रूप माया खे न दिसी सिर्फ़ि अस्ती, भाती, प्रिय थो पसे। माया ऐं ब्रह्म मेलाप मां ट्रियों संसारु। जिअं हंसु, खीरु ऐं पाणी अलगि करे, पाणीअ खे त्यागे, सिर्फ़ि खीरु अंगीकारु कन्दो आहे, तिअं वदा सन्त माया जो त्यागु करे, सतिचित आनन्द जे ध्यान में ई मगनु हुआ। इनकरे दुनिया दांहुं त अन्धा ई थिया। हू त दिसनि बि ब्रह्मु, गाल्हाइंनि बि ब्रह्मु त बुधनि बि ब्रह्मु। ब्रह्म बिना बियो की कीन। जिनि दुनिया दांहुं अखियूं बन्दि रखिंयूं, तिनि जूं अखिंयूं अन्दर में झाती पाए पहंजो पाण सुञाणण में सहायता थियूं कनि ।
दुनिया जो पूरो पूरो अभ्यासु हिननि सन्तति महसूसु कयो हो । प्रभू जा रंग दिसी हैरत में हैरान रहान्दा हुआ। जंहिंजे हथ में आहे संसार जी दोरी तंहिंजी वरती हिति हुननि ओट । अहिड़नि खे संसार जी मुहताजी न थी कढिणी पवे। लेकिन संसार सन्दनि अधीनु आहे।
ईश्वरी प्रेम जी आगि में मिड़नी तृष्नाउनि खे खइ करे छदियों हुआईं ऐं मन ते समूरो ई वक्त सुवारु हुआ ।
हुननि जी इहा पदवी हुई जीअं इन्सान खे जीअरे मुक्ति कोठिजे। जेके मरण खां अगु ई मरी चुका तिनि खे मौत छा करे सधन्दो? जिनि में ”मां” आहे ई कोन ऐं रुगो “तू” ई “‘तू” आहे, उन्हनि ई फ़ना मां बका हासुलु कई आहे।
प्रभूअ जो दर्शन उन्हनि ई कयो आहे, जेके संसार में मरी पोई जीअरा थिया अहिनि, याने जिनि आपो कढी, पंहिजी हस्ती मिटाए, पाण खे तुच्छु समुझियो। स्वामी दाँ॒दूराम साहिब जनि उन्हनि महापुरुषनि मां हुआ। ईश्वर जे नाले जी मस्ती लिकण जी न आहे। जीअं खस्तूरीअ खे किथे बि खणी छिपाए रखु त बि उहा सुरहाणि कढंदी। तीअं सच्चे सन्त जी मस्ती, हू केतिरो बि खणी उनखे लिकाइणु चाहे, जरूरु पधिरी थी पवन्दी। जिनि प्रभूअ जो पांधु पकिड़ियो आहे, तिनि खां प्रभू पलक बि जुदा न आहे, ऐं जे मालिक सां हर वक्त रिहाणियूं कन्दा था रहनि तिनि जा चरन संसारु चुमे थो, तिनि जी दज़ आदमी मस्तक ते हणी पाण खे पवित्रु था जाणनि।
बाणीअ लाइ प्रेमु ऐं गुरनि लाइ सिदिकु हद दर्जे जो होनि। नानक जे नाले तां बल्हारु वेन्दा हुआ। उन प्रेम जे अगियां हिननि लाइ संसारु तुच्छु आहे। ट्रियों सालु थियो आहे त हर साल शिव जे मेले बइदि ख़ासु ब जणां चाढे अमृतसर मेकिलींदा आहिनि त उते वञी अखण्डु पाठु साहिबु रखाईनि, लंगरु कनि। यारहं सौ रुपया उन कम नाले पासीरा करे रखन्दा हुआ। इन मोके लाइ ख़ासु ऊचा रूमाल ठहिराए तियारु कन्दा हुआ। जंहिं वक्ति उहे ब जणां सन्तनि जो दाजो खणी संदनि साहुरे घरि रवाना थींदा हुआ उन वक्त साईं दाँ॒दूराम साहिब जनि जे मुंहं ते सुरहाई नज़रि ईन्दी हुई, उहा दिसण वटां हुई। कपिड़नि में ईं न मापन्दा हुआ! हिक हंधि वेठा हुआ। अजबु त इहो आहे त किथां थो एतिरो पैसो अचे, जंहिंमा हेदो कारोबारु हलाईन्दा हुआ। ईश्वरी नाले जो पारसु हथि अची वियो हो, जंहिं द्वारां लोहु सोनु कयो पिया हलाईन्दा हुआ। विश्वास गुरू नानक में त अथाहु होनि। ”कमु बि संदनि, पूराओं बि पाण कन्दा, असीं आहियूं शेवाधारी।” इहे अखर अकिसिरि संदनि मुख मां निकिरन्दा बुधिबा हुआ। रखाईनि पाठ त बि इएं चवन्दा हुआ त “गुरू नानक अर्पणु” जे नानक जे नींहं में मस्तु थिया, तिनिखे भला दुनिया कहिड़ी कशशि कन्दी !
अजमेर में शान्तीअ जा सरूपु सन्त दाँ॒दूराम साहिबनि जो नामाचारु तमामु घणो वधी वियो। उहो को माण्हू शहर जो न हूंदो, जंहिं संदनि दर्शनु न कयो हूंदो। हर सालि ट्रे मेला लगन्दा हुआ। सुबूह खां वठी शाम ताईं भण्डारो चालू हूंदो हो, जिते शहर जा अटिकल पंज छह हजार माण्हू अची लंगरु खाई शीतलु जलु पी आशीर्वाद वठन्दा हुआ।
प्रभात जो टीं बजे उथी क्रिया करमु लाहे, इश्नानु पाणी करे गुरू ग्रंथं साहिब जो प्रकाशु कन्दा हुआ, उन महिल बियनि घरनि जा ख़्वाहि दरबार जा माण्हू उथी दर्शन कन्दा हुआ। पोइ गुरुनि जे बाणीअ जा शब्द गाईन्दा हआ। उन महिल गुरुनि तां बल्हार वञी, जेका संदनि ठहियल दहनि अवतारनि खे वेनिती आहे सा घणी नीज़ारीअ सां गाईंन्दा हुआ। संदनि ठाहियल बाणीअ मां दिसन्दउ त केतिरी न निहठाई थी नज़रि अचे। हिक हिक अखर में रूहानी राज़ु ऐं कतिरो न प्रेमु समायलु आहे। पंजे बजे वरी आसादीवार, शब्द् ऐं कीर्तनु कन्दा हुआ, जो ब कलाक खनु हलन्दो हेा। वरी 8 बजे खां वठी 12 बजे ताईं भण्डारो चालू रखन्दा हुआ। उन्हीअ विच में जेको बि प्रेमी ईन्दो हो तंहिं सां हालु अहवालु दींदा वठन्दा हुआ ऐं ज्ञान गोष्ठी कन्दा हुआ। वरी बारहें खां हिक बजे ताईं वशिष्ठ महराज जी कथा कन्दा हुआ, हिक बजे खां बी बजे ताईं गुरुनि जें दहनि पातिशाहियुनि जूं जीवन साखियूं पढ़ी अर्थु ऐं दृष्टांत बुधाईन्दा हुआ। बी खां अढाई ताईं शबदु ऐं आरती ऐं अरदास कन्दा हुआ। अढाई खां पोणे ट्रं ताईं सेसा ऐं कणाहु प्रसादु आयल प्रेमियुनि में विरहायो वेन्दो हो ट्रीं खां छहें बजे ताई माण्हुनि सां वातावरण ऐं टपाल पढ़ण लिखण में गुज़ारण, वरी शाम जो 7 बजे खां 8 बजे रहरासु आरती ऐं अरदास पढहणु वरी रात जो रसोई करे नवें बजे कीर्तनु सोहिला पढ़ी आरामु कन्दा हुआ। कदहिं कदहिं त जेसताईं प्रेमी वेठा हंदा हुआ तेसताईं रात जो आरामु न कन्दा हुआ।
अजमेर में हिक दफ़े को फ़कीरु आयो ऐं अची अर्ज़ु कयाईं त साईं का पुराणी धोती दियोमि। मगरि साध खट तां उथन्दे जेका हेठां बदन ते धोती नईं पातल हुअनि सा लाहे खेसि दिनांऊं ऐं पाण पीताम्बरी हेठि बधी खट ते वेही रहिया। थोरनि कलाकनि खांपोइ हिक महमानु कंहिं बिए शहर खूं अची दरबारि में लथो, जंहिं मथो टेके पंहिंजे पेतीअ मां हिक धोती कढी साधनि खे दिनी ऐं चयाईं त साईं हीअ धोती मूं कलकत्ते मां घुराई हुईं। तंहिंते साधनि वराणियो त अबा तदहिं त मां तो लाइ तरसियो वेठो आहियां त इझो थो धोती खणी अची, दिसु त हेठि पीताम्बरी बधल अथमि या न। सभु उहो लकाउ उते जे वेठल माण्हुनि पिए दिठो ऐं अजब में पेई चवण लगा त केतिरो न साईं जनि लातमा आहिनि जो हुअनि बि हिक धोती सा बि बदन तां लाहे फ़कीर खे दिनांऊं ऐं पाण अंगोछो बधी वेही रहिया।
हर साल अमृतसर ऐं सचखण्ड दरबार साहिब, हुज़ूर साहिब दांहुं पंहिंजा माण्हू मोंकिलींदा हुआ जे अखण्ड पाठ साहिबु रखाए भागु साहिबु पाराए लंगरु कराईन्दा हुआ, जिते हज़ारे माण्हू टुकिरी खाई आसीस कन्दा हुआ। पाण असुलु बाहिरि कीन वेन्दा हुआ। जीअं अजमेर में आया तीअं केदांहुं बि पंहिंजे कोठीअ खां बाहिरि पेरु न पाताऊं। जेतोणीकि घणेई माण्हू पंहिंजे घरनि में पाठु साहिबु रखाइण लाइ चवन्दा हुअनि, मगरि सभिनी खे इऐं चवन्दा हुआ त बाबा असां खे उज़रु आहे बाहिरि निकिरणो कीन आहे। बराबरि दिसो त कींअ न पूरे कामिल दरवेश सजा सारा 12 साल उन कोठीअ खां पेरु बाहिरि कीन रखियाऊं अहिडीअ रीति खिम्या जा सागर, भगितीअ जा भण्डार, सन्तोष सरूप, पंहिंजे नशे में हिक कोठीअ में रहिया। 70 साल उमिरि हूंदे बि सन्तनि जी नज़र बिल्कुलु ठीकु हूंदी हुई।
हिक दींहुं सन्तनि भाई वाधूराम खे सदे चयो त पुट हाणे पछाड़ी आहे ऐं असां बईं (भाई होतूराम साहिब) बि कोन रहन्दासीं सोई टे हजार रुपया वृन्दावन, मथुरा, गोकुल, अयोध्या, गया काशी वग़ेरह ब्रह्मण खाराए अचु। जे सन्तनि जे सरीरु छदण खां हिक सालु अगु कया विया। पोइ हिक दुीहुं भाई होतूराम साहिब जनि साधनि वदनि खे पंहिंजे कोठीअ में घुराए (छो त पाण उन वक्ति खट ते हुआ) 11 सौ रोक ऐं बियो अठनि सवनि खन जो सोनु सन्तनि खे भेट कया जंहिं ते साधनि वदनि मुश्की चयो त अदा इहे पुष्कर राज ते मोकिलियो त ब्रह्मण खाईनि पर भाई होतूराम साहिबन चयो त बाबा जेकी मुंहिंजे चित्त में हो सो मूं उते मोकिलियो आहे ऐं ही तव्हां साहिबनि जे भेट आहे। साधनि वदुनि “बाबा दाँ॒दूराम साहिब” मुश्की चयों त, अदा गदु आहियूं को बि ख़्यालु न कयो। भाई होतूराम साहिब जनि शरीरु छदियो त भाई वाधृूराम साहिब जनि खण्डवा वञण लाइ मोकल घुरी। जंहिंखे चयाऊं त पुट हाणे असांजी पछाडी आहे तूं सुभाणे अमृतसर वञु भाई होतूराम साहिब जा दिनल पैसा ख़्वाहि जेके बिया बि रखियल आहिनि, से गुरनि खे देई अचु त असां बि मंकिलायूं। तंहिं ते भाई वाधूराम जनि चयो त साईं सदाईं शिव खां पोइ मोकिलींदा आहियो । तंहिंते फरमायाऊं त पुट शिव कोन दिसन्दासीं, जानी इहे गाल्हियूं समझन्दा। भाई वाधूराम जनि खण्डवा खां हुजूर साहिब सवलो समुझी उन नमूने जी आज्ञा पाए पंज सौ ऐं रूमाल वठी राना थिया। वञण महल सन्तनि चयुनि त पुट देरि न कजि ऐं जल्दु वञिजांइ।
भाई वाधूराम जनि कुझु दींहं खण्डवा में रहिया उते वदनि साधनि चिठी लिखयनि त तमामु जल्दु उदामु ऐं वञी सामानु पहुचाइ असां तियारु आहियूं। बराबरि चइनि पंजनि दींहंनि में भाई वाधूराम खे तार मोकिली वेई त साधनि वदनि चोलो छदियो।
उहा आक्टोबर 1959 जी 9 (नाईं) तारीख़़ हुई, जो जीअं नियम मूजिबि गुरुनि जो प्रकाशु पिए कयाऊं तीअं खेनि हरनिया जी तकलीफ़ थी, जा ओचितो सुबुह ताईं वधी वेई। हूंअ बि कंहिं महिल का तकलीफ़ थींदी हुअनि त हिक पुड़ी वठन्दा हुआ। अजु उन बि असरु न देखारियो। पासे में रहन्दड़ आसूदेमल ईदनाणीअ जंहिं वटि मेले जे वक्ति कुझु महिमान रहाईन्दा हुआ ऐं खेसि दादो करे सदु कन्दा हुआ, उनखे घुराए चयाऊं त दादा अजु तुहिंजी पुड़ी बि जवाबु देई वेई अथई, मिलाइ हथु ऐं मोकिलाइ। गाल्हाईन्दा हुआ सदाईं खिल ख़ुशीअ में, को ज्ञानी समुझे !
किनि प्रेमियुनिं जो रायो हो त साधनि खे अस्पताल में भर्ती कराइजे। अहिड़ी गाल्हि साधनि खे बुधाई वेई, जंहिंते चयाऊं त “डॉक्टरु उमिरि त वधाए कोन दींदो” आख़िर डॉक्टरु घुरायो वियो, जंहिं सलाह दिनी त हरनिया जो आप्रेशनु हुअणु ज़रूरी आहे न त तकलीफ़ वधी वेन्दी। इहा गाल्हि सन्तति खे न वणी ऐं चयाऊं “कसमु अथव गुरू नानक जो मतां मूंखे अस्पताल वठी वञो, अड़े मूंखे गुरनि जे गोद मां न कढ़िजो। मूंखे उतां जीअरो कोन आणीदउ।”
गाल्हि त सचु हुई, सभिनी जे अखियुनि में आंसू टिमण लगा पर सरीर जी तकलीफ़ दिसी कंहिंजी बि दिलि न बधी ऐं साधनि वदनि खे बेहोशीअ जी सुई हणी अस्पताल नियो वियो। बिए दींहुं आप्रेशनु करण खां अगु में साधनि जप साहिब जो पाठु पिए कयो। आख़िर शुक्रवार तारीख 9 आक्टोबर 1959 सुबुह जो 9 लागी 5 मिन्ट थिया हुआ त जोती जोति समाया। अजमेर जे अस्पताल में मेड़ु अची पलटियो, चौधारी तारूं थी वेयूं ख़बर विजु वांगुरु सजे हिन्दुस्तान में फहिलजी वेई। प्रेमी अची गदु थिया । बिए दींहुं विधीअ रीति अनुसार अग्नी संस्कार कयो वियो। कलमु उन वक्त जा रूइदादि हुई, तंहिंजी कथ नथो करे सधे। को एकड़ि बेकड़ि अजमेर जे शहर में माण्हू हूंदो जो संदनि अर्थीअ सां गदु न हूंदो। बाजा, तबिला, बैंडूं शहनायूं सेसाऊं, सुखो, पताशनि जूं घोरूं, पैसनि जूं घोरूं। बारनि ऐं ज़ालुनि कोठनि तां बिही पिए रुनो।
समो गुज़िरन्दो रहियो। अजु बि दरबार काइमु आहे। माण्हू पंहिंजू कामनाऊं परे परे खां अची पूरीयूं करे था वञनि। संदनि शेवाधारी सागिए ई नाम जे नाले तां बलहारु था वञनि ऐं मेला पिया लगाईनि।
ƪઉ 🌻धन गुरु नानक 🌺 ƪઉ
ƪઉ 🌻 सतनाम श्री वाहेगुरु 🌺 ƪઉ
